【要幾hea有幾hea】石垣島做乜好？九大必玩地方
石垣島係沖繩嘅其中一個群島，雖然咁講，但係以前係那霸仲要再轉機，要花好長時間。但自從廉航開通左石垣島航線之後，個半鐘就可以到達呢個風光明媚嘅地方，享受一個陽光與海灘嘅悠閒假期。
1. 米原海岸
米原海岸雖然無川平灣咁出名，但絕對係小編最喜歡嘅地方！潔白嘅沙灘延綿不斷，海水清澈到可以望到低。而且遊客堅係唔多，唔會好似石澳咁人山人海，唔講仲以為去左東南亞嘅神秘小島。
沙灘旁邊不時會見到形狀奇特嘅海蝕地貌。
米原海岸亦係當地嘅浮潛勝地，沿岸嘅海洋生物非常豐富。你可以事先租定浮潛裝備，大約 1500 yen 左右，然後係岸邊就可以落水浮潛。唔好以為岸邊應該無咩野睇，呢度嘅珊瑚同魚分分鐘多過你坐船出海！
2. 平久保崎燈塔
平久保崎係石垣島北邊，蔚藍大海襯托純白色嘅燈塔，成個畫面本身已經好療癒。太陽落山時，呢度仲可以欣賞到非常浪漫嘅日落。
燈塔上面可以見到石垣島沿岸嘅海灣。
3. 幻之島
幻之島其實唔係真係一個島，而係一係沙洲，只有退潮嘅時候先會出現，非常奇幻。
你可以參加當地嘅 local tour，全日行程大概 7000 yen 左右，包括幻之島浮潛，再包埋一套美人魚衫同攝影，都幾抵玩的。
陽光照射下，成個海超靚！！
4. 川平灣
川平灣係石垣島最出名嘅海灘，遊客比較多。不過交通比較方便，市中心有巴士直到。除左水清沙幼嘅海灘，仲有船底由玻璃製造嘅觀光船，等遊客可以更加清楚地欣賞清徹嘅海底世界。
5. 石垣燒肉
講到特色美食，石垣島嘅牛肉非常出名，一定要去當地嘅燒肉店試一試佢地嘅頂級和牛。
一個套餐包括牛嘅唔同部位，可以試到唔同嘅肉質同口感。
6. 宮良川獨木舟體驗
宮良川擁有一大片紅樹林，屬於日本國家自然保護區嘅一部分。獨木舟導遊除左會帶你穿越紅樹林，日落時分，大家會一齊係大海中間欣賞太陽落山嘅一刻，都係一個非常難忘嘅體驗。成個 tour 大約 7000 yen，大概玩 2-3 個鐘。
7. 伊原間鍾乳洞
唔好以為石垣島只有陽光與海灘，仲可以睇鍾乳洞。伊原間鍾乳洞經歷 20 萬年歲月形成，行完全程大概 30 分鐘左右。
鍾乳洞盡頭仲可以通去另一個神秘小海灘，大自然造景嘅力量實在是太神奇！
伊原間鍾乳洞
開放時間 : 9:00 – 18:00
門票 : 大人 1200日圓 / 小童 600 日圓 (4歲 – 國中生)
8. 玉取崎展望台
玉取崎展望台嘅位置比較高，視野非常廣闊，幾乎可以望到全個北部半島嘅風景。
從高處望，會發現石垣島嘅海其實顏色深淺分明。
9. 竹富島
好多人黎石垣島都會去埋附近嘅島仔玩，而竹富島距離石垣島最近，坐船 30 分鐘就到。落船之後，可以租架單車環島一圈，大概 2，3 個鐘左右。
踩到一半，可以到西淺橋影下相。長長嘅西淺橋直入海中，恍惚同海平線融為一體。
石垣島公共交通唔算方便，巴士好多時 2,3 個鐘先一班車，強烈建議一定要租車！
石垣島巴士時間表
米原海岸、川平灣、玉取崎
平久保燈塔