食埋先走 直擊曼谷機場 24 小時美食廣場！
臨急臨忙趕上機未必有時間食野，飛機餐又未必岩胃口，有時真係要餓住個肚走。曼谷蘇凡納布機場 (BKK) 嘅美食廣場絕對可能填補大家空虛嘅肚皮，唔止食物選擇多，價錢平，最緊要係 24 小時營業，幾時食都得！
Magic Food Point 美食廣場嘅裝修比較簡單，不過勝在夠乾淨，有清潔姐姐駐場負責清潔。基本上呢度好多野食，泰式炒河粉、冬蔭公、芒果糯米飯、泰式糖水、咖啡奶茶等等，價錢都係泰銖 $100 以內。
食飯前先去收銀果邊買餐券，買野食果陣俾餐廳用嘅。餐券用唔晒的話，可以返黎退返錢。
所有餐牌圖文並茂，中英泰文對照，叫野食絕對無難度。
小編食左碟泰式炒河粉 (泰銖 $70)，加左花生碎幾好食，不過略嫌咸左少少。
另外叫左碗泰式糖水 (泰銖 $50)，好多料俾你簡，顏色鮮豔，睇落去就好吸引。
牛奶入面加左紅棗、椰果、薏米、蓮子、花生等等嘅配料，幾好味。
呢邊仲可以買啲泰國零食返去做手信。
泰銖 $25 一球，$65 五球雪糕真係好抵！！可惜小編食太飽，無福消受了。
美食廣場嘅位置唔算顯眼，係機場 1 樓 Gate 8 旁邊。
Magic Food Point 美食廣場
位置 : 曼谷蘇凡納布機場 1 樓 Gate 8 旁邊
營業時間 : 24 小時
泰國卡推薦
